អភិបាលខេត្តព្រះសីហនុ បន្តចែកវិញ្ញាបនបត្រសម្គាល់ម្ចាស់អចលនវត្ថុជូនពលរដ្ឋ ២៧១បណ្ណ នៅភូមិព្រែកក្រាញ់ ឃុំសាមគ្គី ស្រុកព្រៃនប់

អភិបាលខេត្តព្រះសីហនុ បន្តចែកវិញ្ញាបនបត្រសម្គាល់ម្ចាស់អចលនវត្ថុជូនពលរដ្ឋ ២៧១បណ្ណ នៅភូមិព្រែកក្រាញ់ ឃុំសាមគ្គី ស្រុកព្រៃនប់

(ព្រះសីហនុ)៖ លោក គួច ចំរើន អភិបាលខេត្តព្រះសីហនុ នៅថ្ងៃទី០៤ ខែកក្កដា ឆ្នាំ២០២៣នេះ បានអញ្ជើញចែកវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋចំនួន២៧១បណ្ណ ស្ថិតក្នុងភូមិព្រែកក្រាញ់ ឃុំសាមគ្គី ស្រុកព្រៃនប់ ខេត្តព្រះសីហនុ។ ពិធីនេះមានការចូលរួមពីអភិបាលរងខេត្ត អភិបាលស្រុក អាជ្ញាធរក្នុងមូលដ្ឋាន ព្រមទាំងប្រជាពលរដ្ឋជាច្រើនគ្រួសារ។

នាឱកាសនោះដែរ លោក គួច ចំរើន បានថ្លែងថា ដីធ្លីពេលដែលទទួលបានប្លង់កម្មសិទ្ធិស្របច្បាប់ ធ្វើយើងទទួលបានអត្ថប្រយោជន៍ច្រើនយ៉ាង។ ពិតណាស់ដីធ្លីដើម្បីឱ្យបញ្ជាក់ជាម្ចាស់កម្មសិទ្ធិករ គឺតាមរយៈការចុះបញ្ជីជាប្រព័ន្ធ ព្រោះវាជាឯកសារមានភាពច្បាស់លាស់ ត្រឹមត្រូវជាងគេ ហើយត្រូវទទួលស្គាល់ជាសាធារណៈរបស់កម្មសិទ្ធិករនៅលើទីតាំងនោះ ហើយមិនមានភាពភ័យខ្លាចមានការគំរៀមគំហែង ឬបដិសេដពីនណាម្នាក់នោះឡើយ។

លោកអភិបាលខេត្ត បានលើកឡើងថា ប្រជាពលរដ្ឋដែលទទួលបានវិញ្ញាបនបត្រសម្គាល់ម្ចាស់អចលនវត្ថុនៅថ្ងៃនេះពិតណាស់ប្រាកដជានឹកដល់សម័យកាលសង្រ្គាមដែលដឹកនាំដោយរបប ប៉ុល ពត បានធ្វើឱ្យប្រទេសកម្ពុជា គ្មានសុខសន្តិភាព ស្ថេរភាពពេញលេញសិទ្ធិរស់រៀនមានជីវិត ជួបជុំគ្រួសារ គ្មានសិទ្ធិកាន់កាប់ដីធ្លីសម្រាប់សង់ផ្ទះសំបែង បង្កបង្កើនផលបង្កើតមុខរបររស៊ីដើម្បីចិញ្ចឹមជីវិត «ប្រទេសជាតិមានសុខសន្តិភាព បានធ្វើឱ្យប្រជាពលរដ្ឋទទួលបានសិទ្ធិគ្រប់បែបយ៉ាង រាប់ទាំងសិទ្ធិជាម្ចាស់លើផ្ទះសម្បែង ដីធ្លី ស្របទៅតាមច្បាប់»។

ជាមួយគ្នានេះដែរ លោក គួច ចំរើន បានបញ្ជាក់ថា បច្ចុប្បន្ននេះ ប្រទេសកម្ពុជាក្រោមការដឹកនាំរបស់សម្តេចតេជោ ហ៊ុន សែន ជានាយករដ្ឋមន្ត្រី បានខិតខំប្រឹងប្រែងគ្រប់បែបយ៉ាង ដោយដៃម្ខាងទប់កុំឱ្យរបបខ្មែរក្រហម ត្រឡប់មកវិញ ដៃម្ខាងកសាងប្រទេសជាតិដែលទើបងើបពីគំនរផេះដែលបន្សល់ពីភ្លើងសង្គ្រាម។

លោកបានថ្លែងថា ប្រទេសជាតិមានសុខសន្តិភាព បានធ្វើឱ្យប្រជាពលរដ្ឋទទួលបានសិទ្ធិគ្រប់បែបយ៉ាង រាប់ទាំងសិទ្ធិជាម្ចាស់លើផ្ទះសម្បែង ដីធ្លី ស្របទៅតាមច្បាប់។

លោកអភិបាលខេត្ត បានគូសបញ្ជាក់ថា ក្រោមដំបូលនៃសន្តិភាពជាង២០ឆ្នាំមកនេះ កម្ពុជាកំពុងតែអភិវឌ្ឍន៍ ជឿនលឿនស្ទើរតែគ្រប់វិស័យ ជាពិសេសសម្តេចតែងតែយកចិត្តទុកដាក់ពីសុខទុករបស់ប្រជាពលរដ្ឋទូរទាំងប្រទេស ជាពិសេសលើកាងារមានសិទ្ធិរស់រៀន ការកាន់កាប់ដីធ្លី ធ្វើយ៉ាងណាឱ្យប្រជាពលរដ្ឋម្នាក់ត្រូវរស់នៅ ឬកាន់កាប់អចលនវត្ថុទាំងអស់ត្រូវមិនមានទំនាស់មុននឹងក្រសួង និងពាក់ព័ន្ធបានចេញបណ្ណសម្គាល់សិទ្ធកាន់កាប់អចលនវត្ថុ ជៀសវាងមានការប្រទាំងប្រទិចគ្នាដែលនាំឱ្យមានការលំបាកដល់ការសិក្សា វិនិច្ឆ័យ លើប្រវត្តដីធ្លីក្នុងការចេញបណ្ណ។

លោក ចេង ស្រុង ប្រធានមន្ទីររៀបចំដែន នគរូបនីយកម្ម សំណង់ និងសូរិយោដីខេត្ត បានឱ្យដឹងថា ចំពោះក្បាលដីដែលបានលើកសំណើរផ្តល់កម្មសិទ្ធ ដើម្បីចេញវិញ្ញាវនបត្រសម្គាល់ម្ចាស់អចលនវត្ថុ (បណ្ណកម្មសិទ្ធិ) មានចំនួនសរុប ៨៨៦ក្បាលដី នៃចំនួនសរុប៩៣៨ក្បាលដី ហើយក្នុងចំណោម ៨៨៦ក្បាលដី សម្រេចចេញចែកជូនបងប្អូនប្រជាពលរដ្ឋនាថ្ងៃនេះមានចំនួនសរុប ២៧១ក្បាលដី។

លោកបន្តទៀតថា ចំពោះដែលក្បាលដីដែលនៅសល់គឺដោយសារក្បាលដីទាំងនោះគឺកំពុងតែសិក្សាបន្ត ព្រោះក្បាលដីខ្លះនៅមិនទាន់មានព័ត៌មានច្បាស់លាស់ឈានទៅដល់ការចេញបណ្ណកម្មសិទ្ធិ តែយ៉ាងណាមិញលោកក៏សូមឱ្យបងប្អូនប្រជាពលរដ្ឋរងចាំនៅពេលខ្លីខាងមុខ។

ក្នុងឱកាសនោះអភិបាលខេត្ត ក៏បានក្រើនរំលឹកប្រជាពលរដ្ឋទាំងអស់ដែលមានឈ្មោះក្នុងបញ្ជីបោះឆ្នោតត្រូវត្រៀមឯកសារឱ្យបានគ្រប់ៗគ្នា ដើម្បីចូលរួមការបោះឆ្នោតជ្រើសតាំងតំណាងរាស្ត្រ នីតិកាលទី៧ ដែលនឹងប្រព្រឹត្តនៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះ៕