(កំពង់ចាម)៖ លោក អ៊ុន ចាន់ដា អភិបាលខេត្តកំពង់ចាម ដឹកនាំមន្ត្រីរាជការជុំវិញខេត្ត លោកគ្រូ អ្នកគ្រូ និងសិស្សានុសិស្សប្រមាណ ៨០០នាក់ នៅព្រឹកថ្ងៃទី១ ខែមិថុនា ឆ្នាំ២០២៤នេះ បានប្រារព្ធខួបអនុស្សាវរីយ៍លើកទី៧៥ ទិវាកុមារអន្តរជាតិ ១មិថុនា ក្រោមប្រធានបទ «ការវិនិយោគលើកុមារថ្ងៃនេះ សំដៅបង្កើនមូលធន មនុស្សក្នុងយុគសម័យបរិវត្តកម្មឌីជីថល» នៅសាលសន្និសីទ សាលាខេត្តកំពង់ចាម។
លោក អ៊ុន ចាន់ដា បានលើកឡើងថា ជារៀងរាល់ឆ្នាំនៅទូទាំងពិភពលោក និយាយរួម និងនិយាយដោយឡែក ប្រទេសកម្ពុជា តែងតែបានប្រារព្ធទិវាកុមារអន្តរជាតិ ១មិថុនា ស្របតាមកម្មវិធីនយោបាយរបស់រាជរដ្ឋាភិបាលកម្ពុជា និងអនុសញ្ញារបស់អង្គការសហប្រជាជាតិស្ដីពី សិទ្ធិកុមារ, អនុសញ្ញាលេខ១៨២ របស់អង្គការអន្តរជាតិ ស្ដីពីការហាមប្រាមសកម្មភាពបន្ទាន់ សម្រាប់ការលុបបំបាត់ទម្រង់ធ្ងន់ធ្ងរបំផុត នៃពលកម្មកុមារ និងបទដ្ឋានជាតិ អន្តរជាតិ ស្តីពីសិទ្ធិកុមារផ្សេងៗទៀត។
លោកអភិបាលខេត្ត បានបន្តថា កុមារ គឺជាអ្នកបន្តវេនប្រទេសជាតិ ដូចពាក្យស្លោកថា «កុមារគឺជាទំពាំងស្នងប្ញស្សី» ហេតុនេះហើយ វាត្រូវការជាចាំបាច់នូវការយកចិត្តទុកដាក់ថែទាំ គាំទ្រពីក្រុមគ្រួសារ សហគមន៍ហើយកុមារមានសិទ្ធិទទួលបាននូវការអភិវឌ្ឍក្នុងបរិស្ថានសង្គមដ៏ល្អប្រសើរ។ ដោយផ្អែកតាមផែនការយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាលកម្ពុជា បានយកចិត្តទុកដាក់ក្នុងការបង្កើនថវិកាលើវិស័យសង្គមកិច្ច អប់រំ សុខាភិបាល
អភិវឌ្ឍជនបទកសិកម្ម និងវិស័យមួយចំនួនទៀត ក្នុងគោលដៅបម្រើឱ្យសុខមាលភាពប្រជាជនកាន់តែមានភាពប្រសើរឡើងពិសេសចំពោះកុមារ។
របាយការណ៍ជាតិ នៃការអនុវត្តអនុសញ្ញាស្តីពីសិទ្ធិកុមារបានវាយតម្លៃជាវិជ្ជមាននូវលទ្ធផល នៃការអនុវត្តសិទ្ធិជាចំបងរបស់កុមារ គឺសិទ្ធិរស់រានមានជីវិត សិទ្ធិទទួលបានការការពារ សិទ្ធិក្នុងការអភិវឌ្ឍ និងសិទ្ធិក្នុងការចូលរួមរបស់កុមារ។
លោកអភិបាលខេត្ត បានឱ្យដឹងថា អត្រាមរណៈមាតា និងទារក ត្រូវបានកាត់បន្ថយការផ្តល់វ៉ាក់សាំង ថ្នាំបង្ការ ជម្ងឺដល់កុមារ ការអប់រំសិក្សា និងការពារការប្រឆាំងនឹងអំពើរំលោភបំពានផ្សេងៗ ត្រូវបានយកចិត្តទុកដាក់ជំរុញឱ្យកាន់តែប្រសើរឡើងជាលំដាប់។ ទោះបីជាយ៉ាងណាក្តី កុមារកម្ពុជា នៅប្រឈមមុខជាមួយនឹងបញ្ហាមួយចំនួននៅឡើយ ដូចជាអំពើហិង្សាលើកុមារ ការប្រើប្រាស់គ្រឿងញៀន (អនិតិជនទំនាស់នឹងច្បាប់ អំពើជួញដូរកុមារ ពលកម្មកុមារ។ល។ ទាំងអស់នេះ ដែលតម្រូវឱ្យយើងទាំងអស់គ្នា ត្រូវរួមគ្នាដោះស្រាយឱ្យបានទាន់ពេលវេលា និងចំគោលដៅ៕
About chbarampovpost.com
DDD
0 comments:
Post a Comment