ជុំទីពីរនៃកិច្ចចរចារវាងរុស្ស៊ី-អ៊ុយក្រែននឹងប្រព្រឹត្តទៅនៅថ្ងៃទី២ ខែមីនានេះ

ភ្នំពេញ:ថ្ងៃទី០២ ខែមីនា ឆ្នាំ២០២២ ប្រព័ន្ធផ្សព្វផ្សាយ Zerkalo Nedeli របស់ប្រទេសអ៊ុយក្រែនបាននិយាយកាលពីថ្ងៃអង្គារថា កិច្ចចរចាមួយផ្សេងទៀតរវាងគណៈប្រតិភូរុស្ស៊ី និងអ៊ុយក្រែន គ្រោងធ្វើឡើងនៅថ្ងៃទី២ ខែមីនានេះ។

ប្រព័ន្ធផ្សព្វផ្សាយរបស់អ៊ុយក្រែនមួយផ្សេងទៀត គឺប្រព័ន្ធផ្សព្វផ្សាយ Glavkom បានដកស្រង់ពីប្រភពនៅក្នុងគណៈប្រតិភូអ៊ុយក្រែនដែលបានចូលរួមក្នុងអំឡុងពេលនៃកិច្ចចរចាជុំដំបូងថា ប្រទេសរុស្ស៊ីបានចោទប្រកាន់ថាបានទាមទារឱ្យប្រទេសអ៊ុយក្រែនប្តេជ្ញាចិត្តដើម្បីបិទស្ថានភាពក្រៅប្លុករបស់ខ្លួននៅកម្រិតសភា និងរៀបចំប្រជាមតិមួយទៅលើបញ្ហានេះ។ លើសពីនេះទៀត ភាគីរុស្ស៊ីបានទាមទារឱ្យអ៊ុយក្រែនទទួលស្គាល់សាធារណរដ្ឋប្រជាមានិត Donetsk និងសាធារណរដ្ឋប្រជាមានិត Lugansk នៅក្នុងព្រំដែនរដ្ឋបាលនៃតំបន់ដែលត្រូវគ្នា ហើយទម្លាក់ចោលនូវការទាមទាររបស់ខ្លួនដែលចង់ឱ្យតំបន់គ្រីមៀគួរតែត្រូវបានប្រគល់ឱ្យអ៊ុយក្រែនវិញ។ យោងតាមលោក Glavkom បានឱ្យដឹងថា ប្រទេសអ៊ុយក្រែនបានទាមទារឱ្យមានបទឈប់បាញ់មួយ និងមានការដកកងទ័ពរុស្ស៊ីចេញពីទឹកដីរបស់ខ្លួន។

កិច្ចចរចារវាងរុស្ស៊ី-អ៊ុយក្រែនត្រូវបានធ្វើឡើងកាលពីថ្ងៃចន្ទ។ កិច្ចចរចានេះមានរយៈពេលប្រាំម៉ោង។ គណៈប្រតិភូរុស្ស៊ីដែលដឹកនាំដោយជំនួយការប្រធានាធិបតី លោក វ៉្លាឌីមៀរ មេឌីនស្គី ដែលបាននិយាយនៅពេលមុននេះថា គណៈប្រតិភូរុស្ស៊ីបានត្រៀមខ្លួនរួចជាស្រេចក្នុងការពិភាក្សាជាមួយភាគីអ៊ុយក្រែន ដរាបណាវាត្រូវការពេលដើម្បីឈានដល់កិច្ចព្រមព្រៀងនានា។ លោកក៏បាននិយាយផងដែរថា គណៈប្រតិភូបានព្រមព្រៀងគ្នាជាបឋមដើម្បីធ្វើកិច្ចចរចាលើកក្រោយនៅក្នុងប្រទេសបេឡារុស្ស៕(ប្រភព TASS បកប្រែដោយលោក យា ចិន្តាខន្តី) សម្រួលផ្សាយដោយ៖ dara