កោះកុង៖ លោកវជ្ជបណ្ឌិត ទៅ ម៉ឹង ប្រធានមន្ទីរសុខាភិបាលខេត្តកោះកុង មានប្រសាសន៍ថា អាជ្ញាធរខេត្តនៅតែបន្តពង្រឹង ការត្រួតពិនិត្យសុខភាពតាមច្រកព្រំដែន ហើយចំពោះពលករដែលត្រឡប់មកពីថៃ គឺយើងតម្រូវឱ្យស្នាក់នៅមណ្ឌល ចត្តាឡីស័កកម្រិត២នៃសាលាខេត្តចាស់សិន ។ បន្ទាប់ពីទទួលលទ្ឋផលតេស្តអវិជ្ជមានវីរុសកូវីដ-១៩ ទើបមានការអនុញ្ញាត ឱ្យទៅធ្វើចត្តាឡីស័កឬធ្វើការដាក់ខ្លួនឱ្យនៅដាច់ដោយឡែកចំនួន១៤ថ្ងៃ នៅតាមផ្ទះរៀងៗខ្លួន ដើម្បីការពារការចម្លងជំងឺ កូវីដ-១៩ ចូលក្នុងសហគមន៍។
លោកបន្តថា មន្ត្រីជំនាញបានបន្តផ្សព្វផ្សាយលើបញ្ហាកូវីដ-១៩យ៉ាងសកម្ម ដោយអាជ្ញាធរគ្រប់លំដាប់ថ្នាក់បានណែនាំ ប្រជាពលរដ្ឋត្រូវបន្តចូលរួមអនុវត្តតាមការណែនាំរបស់ក្រសួងសុខាភិបាល ពិសេសពលករដែលឆ្លងពីប្រទេសថៃ គឺយើងត្រួតពិនិត្យសុខភាពបងប្អូនយ៉ាងហ្មត់ចត់ ប្រសិនជាបងប្អូនមិនមានអ្វីនោះទេ ទើបយើងអនុញ្ញាតឱ្យត្រឡប់ទៅ ធ្វើចត្តាឡីស័ករយៈពេល១៤ថ្ងៃនៅផ្ទះ ។
លោកសុវណ្ណ ប៊ុនធឿន ប្រធានទីស្នាក់ការត្រួតពិនិត្យច្រកទ្វារព្រំដែនអន្តរជាតិចាំយាមខេត្តកោះកុងបានឱ្យដឹងដែរថា បច្ចុប្បន្ននេះក្រុមការងារចត្តាឡីស័ក នៃមន្ទីរសុខាភិបាលខេត្តកោះកុង បានធ្វើការត្រួតពិនិត្យកម្ដៅអ្នកបើកបរដឹកទំនិញចេញ-ចូលតាមច្រកព្រំដែនអន្តរជាតិចាំយាម ព្រមជាមួយនឹងការបាញ់ថ្នាំសម្លាប់មេរោគលើរថយន្តដឹកទំនិញ ដើម្បីរួមគ្នាទប់ស្កាត់ និងបង្រ្កាបការរីករាលដាលជំងឺកូវីដ-១៩ក្នុងតំបន់។
មន្រ្តីមន្ទីរសុខាភិបាលបានអះអាងថា បច្នុប្បន្ននេះ ប្រជាពលរដ្ឋ នៅទូទាំងខេត្តកោះកុង មានការយល់ដឹងច្រើន ទាក់ទងទៅនឹងបញ្ហាជំងឺកូវីដ-១៩ និងជំងឺឆ្លងផ្សេងៗទៀត ក្រោយពីមានការណែនាំជាបន្តបន្ទាប់ពីប្រមុខរាជរដ្ឋាភិបាល ក្រសួងសុខាភិបាល និងអាជ្ញាធរមានសមត្ថកិច្ចនៅក្នុងមូលដ្ឋាន៕ប្រពភ
វិទ្យុជាតិកម្ពុជា៖ លោកស្រី ធីណា ឌីណេ
0 comments:
Post a Comment